झारखंडमध्ये फटाक्यांवर बंदी!

प्रतिनिधी :मिलन शहा

रांची: झारखंड राज्य प्रदूषण नियंत्रण मंडळाने दिवाळी, छठ आणि गुरुपर्व या दिवशी फटाक्यांमुळे होणारे प्रदूषण नियंत्रित करण्यासाठी फटाक्यांची वेळ निश्चित केली आहे. या तिन्ही सणांना फटाक्यांची वेळ केवळ दोन तास, तर ख्रिसमस आणि नववर्षाला केवळ 35 मिनिटे निश्चित करण्यात आली आहे.

जारी करण्यात आलेल्या मार्गदर्शक सूचनांनुसार दिवाळीच्या रात्री 8 ते 10 या वेळेतच फटाके फोडण्याची परवानगी असेल. छठच्या दिवशी सकाळी 6 ते 8, गुरुपर्व रोजी रात्री 8 ते 10 आणि ख्रिसमस आणि नवीन वर्षाच्या दिवशी 31 डिसेंबर रोजी रात्री 11.55 ते 12:30 या वेळेत फटाके वाजविण्यास परवानगी असेल.

झारखंड उच्च न्यायालयाने दिनांक 16 ऑक्टोबर 2024,रोजी रांचीमधील वाढते ध्वनिप्रदूषण रोखण्यासाठी कठोर निर्देश दिले आहेत. या जनहित याचिकेवर सुनावणी करताना न्यायालयाने सांगितले की, ध्वनिप्रदूषणाबाबत तक्रारी दाखल करणाऱ्यांची नावे गोपनीय ठेवली पाहिजेत.

न्यायालयाने या प्रकरणी झारखंड राज्य प्रदूषण नियंत्रण मंडळाला निर्देशही दिले आहेत. राष्ट्रीय हरित न्यायाधिकरणाच्या आदेशाच्या आधारे प्रदूषण नियंत्रण मंडळाने फटाक्यांची मानके निश्चित केली आहेत. ज्या शहरांमध्ये हवेची गुणवत्ता चांगली किंवा समाधानकारक असेल, तेथे फटाके फोडण्याची परवानगी वेळेच्या आतच दिली जाईल.

125 डेसिबलपेक्षा कमी आवाजाचे फटाकेच विकता येतील आणि सायलेंट झोनमध्ये शंभर मीटरच्या परिघात फटाके फोडण्यास पूर्ण बंदी असेल. या सूचनांचे उल्लंघन केल्यास वायू प्रदूषण प्रतिबंधक कायद्यान्वये कारवाई केली जाईल.